REVEALED! The actual letter Mikel Obi sent to Nigerian media over the ‘Chelsea Punishment’ allegations

Hello from the other side,

My lawyers dem and the other people wey I dey help their hustle every month don yarn me say una dey carry rumor say I talk wetin I no talk. Dem say una talk say I been tell una say Chelsea dey punish me because I go Olympics. E bin don tey wey I dey suspect say una be enemy of progress, but na now I just confirm.

When I tell una say dem punish me? Which kind punishment? Conte never for once ask me to kneel down or do monkey ride – even when I bin dey late come training because me and madam play small for night -, my money dey enter every Friday and I dey chop free food for Cobhams. So, wetin come be the punishment wey una dey make noise? Ordinary small playing time that I am not getting?

You people want to make noise and send me away from where the farm is green. I no go swear for una and I no go bless una. Na so una dey carry news one time say make I comot go where dem go dey give me playing time. Dis playing time wey una dey always shout sef, na him go buy me new bus wey I go send go Enugu for transport? Na him go pay my children school fees? Who playing time don ever epp?

I know una problem, and na because una no hear English. After all the years wey I don spend for England, my level of English don pass the one wey una understand. As from today, all interview go be for Igbo or Yoruba. Na wetin una sabi be that.

Finally, before I go, make una give una sef brain. No pour sand-sand for my garri. I like Chelsea and dem like me back. If I like, I go sit down for bench or sleep for bed every weekend. It is not your bench or concern. Make una no use una aproko mouth pursue maga wey God don give me from heaven.

Good day and good bye.